دانش سکول میں طلباء کو ااعلیٰ معیار کی تعلیم مفت فراہم کی جارہی ہے حسن خاور محمود

راجن پور(ڈسٹر کٹ رپورٹر ) تعلیم ترقی کا بہترین ذریعہ ہے، دانش سکول میں طلباء کو ااعلیٰ معیار کی تعلیم مفت فراہم کی جارہی ہے۔ تعلیم کے ساتھ ساتھ طلباء کو رہائش، خوراک اور کپڑوں سمیت ضروریات زندگی کا دیگر سامان بھی بلامعاوضہ دیا جارہا ہے۔ان خیالات کا اظہار لفٹنینٹ کرنل (ر) حسن خاور محمود پرنسپل دانش سکول نے ایک بیان میں کیا۔ انہوں نے کہا کہ یہ ادارہ علاقے کے مستحق طلبا کے لئے کسی نعمت سے کم نہیں۔ نئے تعلیمی سیشن میں داخلوں کا آغاز ہو چکا ہے،دس سے بارہ سال کی عمر کے طلبا داخلہ لے سکتے ہیں۔ اس سلسلے میں داخلہ فارم سکول کے علاوہ ڈی سی او آفس راجن پوراور ای ڈی او ایجوکیشن کے دفتر سے بھی حاصل کیا جاسکتا ہے۔ ہر طرح سے مکمل فارم 15 دسمبر تک وصول کئے جائیں۔انہوں نے مزید کہا کہ والدین اور طلبا کی سہولت کو مدِنظر رکھتے ہوئے ضلع کی تینوں تحصیلوں میں امیدواروں کا ٹسٹ لیا جائے گا۔ تحصیل روجھان میں 28دسمبربمقام گورنمنٹ ہائی سکول روجھان، راجن پور میں 04جنوری کو گورنمنٹ ہائی سکول نمبر1جبکہ جام پور میں 11جنوری کو گورنمنٹ ہائی سکول جام پور میں داخلہ ٹسٹ ہوگا، آخری ٹسٹ18 جنوری کو دانش سکول میں لیا جائے گا۔ انہوں نے کہا کہ دانش سکول میں پہلی ترجیح یتیم اور غریب طلبا کو حاصل ہے۔اس کے بعد کم آمدنی والے، ان پڑھ افراد کے بچوں کو ترجیح دی جاتی ہے۔تعلیم کے ذریعے غربت کے خاتمے کا ہدف آسانی سے حاصل کیا جاسکتا ہے۔ اس لئے معاشرے کے پسماندہ طبقات کے بچے تعلیم حاصل کرنے کو اپنی پہلی ترجیح قرار دیں۔داخلے کے سلسلے میں مزید معلومات کے حصول کے لئے ٹیلی فون0604-302128, 0604-302119پر بھی رابطہ کیا جاسکتا ہے۔