ڈی سی او راجن پور ظہور حسین گجر نے کاہا نالہ،سیفنز اور مختلف رودکوہی کے راستوں کامعائنہ

راجن پور (ڈسٹر کٹ رپورٹر)ڈی سی او راجن پور ظہور حسین گجر نے کاہا نالہ،سیفنز اور مختلف رودکوہی کے راستوں کامعائنہ کیا اور کہا کہ ضلعی انتظامیہ اور ایریگیشن ڈیپارٹمنٹ کی رودکوہی روٹس کی نگرانی دن رات جاری ہے۔ اس سلسلے میں ضلعی ہیڈ کوارٹر پر فلڈ کنٹرول روم کو بھی راؤنڈ دی کلاک ایکٹو کر دیا گیا ہے۔ کوشش ہے کہ ممکنہ سیلاب کے پیش نظر آبادی کو مکمل طور پر محفوظ کیا جائے اور اس سلسلے میں ضلع بھر کے حفاظتی بندوں کے پشتوں کو مضبوط کیا جا رہا ہے۔انہوں نے کہا کہ ممکنہ سیلاب سے نمٹنے کے لئے انتظامات مکمل ہیں۔خدانخواستہ اس ناگہانی آفت سے لوگوں کی جان و مال کی حفاظت کو ہر صورت ممکن بنایا جائے گا۔اس موقع پر ا یکسیئن انہار،ای ڈی او زراعت ،ایس ڈی اوز رودکوہی اور دیگر متعلقہ افسران ان کے ہمراہ تھے۔ڈی سی او نے کہا کہ فلڈ آنے کی صورت میں ریلیف کیمپ اورمیڈیکل کیمپ لگانے کے لئے تمام انتظامات مکمل ہیں۔ریسکیو 1122کی ٹیمیں ہمہ وقت قدرتی آفات سے نمٹنے کے لئے الرٹ رہیں۔ انہوں نے تما م متعلقہ محکموں کے سربراہان کو ہدایت کی کہ سیلاب آنے سے پہلے تمام تیاریاں مکمل رکھیں ۔اس سلسلے میں کسی قسم کی کمی یا کوتاہی کو برداشت نہیں کیا جائے گا۔انہوں نے ایکسیئن رودکوہی محمد جاوید کو ہدایت کی کہ سیلابی حفاظتی بندوں کی مرمتی اور ان کی دیکھ بھال کو چوبیس گھنٹے مانیٹر کیا جائے۔