ایام عاشور کا تقدس ہر مسلمان پر فرض ہےظہور حسین گجر

راجن پور ( ڈسٹر کٹ رپورٹر)ڈسٹرکٹ کوارڈنیشن آفیسر ظہور حسین گجر نے محرم الحرام کے انتظامات کے حوالے سے منعقدہ اجلاس کی صدارت کرتے ہوئے کہا کہ ایام عاشور کا تقدس ہر مسلمان پر فرض ہے۔اور انتظامیہ امن کے لئے مضبوط منصوبہ بندی پر عمل پیرا ہے۔مجالس اور جلوسوں کے راستوں کی سی سی ٹی وی کیمروں سے نگرانی کی جا ئے گی۔تحصیل اورضلعی سطح پر کنٹرول روم قائم کئے جا رہے ہیں۔ان خیالات کا اظہار انہوں نے محرم الحرام کے انتظامات کے سلسلے میں منعقدہ ضلعی امن کمیٹی کے اجلاس کے دوران کیا۔ اس موقع پر ڈی پی او عرفان اللہ،ڈی ایس پی ٹریفک،اسسٹنٹ کمشنرز،ٹی ایم اوز ،ای ڈی او صحت کے علاوہ ضلعی امن کمیٹی کے ممبران،علماء کرام اور دیگر متعلقہ افسران نے شرکت کی۔ ڈی سی او نے ای ڈی او صحت کو ہدایت کرتے ہوئے کہا کہ ایام عاشور کے دوران ڈسٹرکٹ ہیڈ کوآرٹر ہسپتال،ٹی ایچ کیو اور دیگر سرکاری ہسپتالوں میں ڈاکٹرز اور پیرا میڈیکل سٹاف ،ایمبولینسز راؤنڈ دی کلاک موجود رہیں گی۔ڈسٹرکٹ پولیس آفیسرراجن پور حافظ عرفان اللہ نے اجلاس سے خطاب کرتے ہوئے کہا کہ جلوس،مجالس اور تعزیہ لائسنس داران طے شدہ روٹس اور اوقات کی پابندی کو یقینی بنائیں گے۔ہر آنے والے شخص کی واک تھرو گیٹ اور میٹل ڈیٹیکٹر سے چیکنگ ہو گی۔ٹی ایم اوز ،اسسٹنٹ کمشنرز اور ایکسیئن واپڈا نے اجلاس میں بریفنگ دیتے ہوئے بتایا کہ جلوسوں کے راستوں پر لائٹس کا بہترین انتظام کیا جائے گا۔ریسکیو 1122کی ایمبولینسز جلوسوں کے روٹس پر جلوس کے ساتھ ساتھ رہیں گی۔اجلاس میں موجود ضلعی امن کمیٹی کے ممبران نے اپنے بھرپور تعاون کا یقین دلاتے ہو ئے کہا کہ یہ ضلع امن کی مثال ہے ۔تمام مسالک کے علماء کرام میں ہم آہنگی پائی جاتی ہے۔اور ہمیشہ کی طرح اس اخوت وبھائی چارے کی مثال کو برقرار رکھا جائے گا۔