طلباء پاکستان کا قیمتی سرمایہ ہیں۔ محمد اسلم

 

راجن پور(کرائم رپورٹر،نامہ نگار)طلباء پاکستان کا قیمتی سرمایہ ہیں۔ طلباء کو چاہیئے کہ اپنی بھرپور توجہ تعلیم و تربیت پر دیں ۔ان کی تعلیم کا مقصد سچا پاکستانی بننا ہونا چاہیئے۔ ان خیالات کا اظہار میجر(ر) محمد اسلم نے یوم پاکستان کی تقریب سے خطاب کرتے ہوئے کیا۔ انہوں نے کہا کہ مذہبی ، لسانی اور نسلی تعصبات ہمارے وطن کے لئے نہایت نقصان دہ ہیں ۔طلبا ان تمام تعصبات سے دور رہ کر ہی کامیابی حاصل کر سکتے ہیں۔ پاکستان کے پرچم کی سربلندی کے لئے ہمیں ہر وقت کوشاں رہنا چاہیئے۔ اس ملک کو حاصل کرنے کے لئے ہمارے بزرگوں نے بہت سی قربانیاں دیں۔ اب ہمارا فرض ہے کہ ہم وطن کی خدمت کریں۔ یوم پاکستان کے حوالے سے یہ تقریب پنجاب دانش سکول فاضل پور کے فریدؒ ہال میں منعقد ہوئی ۔جس میں سکول کے اساتذہ اور طلباء نے بھرپور شرکت کی۔طلباء عمیس الاسلام، معاذ خان، کاشف مصطفےٰ، عتیق شہزاد، حنظلہ منور، شاہزیب سلیم، محمد فیاض نے تلاوت اور نعت کے بعد ملی نغمے پیش کئے۔ یوم پاکستان کے حوالے سے طلباء سکندراعظم، محمد داود ارقم، ابو بکر، محمدندیم احمد، محمد عامر، احمد ندیم عثمانی نے تقاریر کیں جن میں آازادی کی اہمیت اور وطن کے لئے ہر قسم کی قربانی دینے کے عزم کو دہرایا گیا۔ طلبا ء عون قاسم، عمیر رفیق، اظہر عباس اور ساتھی طلباء نے قیام پاکستان کے موضوع پر خاکے بھی پیش کئے۔ تقریب کے آخر میں ملک وملت کی ترقی اور کامیابی کے حوالے سے دعاکرائی گئی